All Posts By

gyda

Endurnýjun á kjarasamningi FL við ríki.

By | Óflokkað | Engar athugasemdir

Staðið hefur yfir atkvæðagreiðsla vegna endurnýjunar kjarasamnings FL við fjármálaráðherra. Með samningnum fylgir yfirlýsing þriggja ráðherra um umbætur í heilbrigðiskerfi landsmanna. Félagsmenn samþykktu samninginn og voru úrslit atkvæðagreiðslu eftirfarandi:


Á kjörskrá voru 225 félagsmenn.

Atkvæði greiddu 154 félagsmenn eða 68,4%, atkvæði skiptust þannig:

Samþykkt: 109 – 70,8%

Hafnað: 35 – 22,7%

Auð: 10 – 6,5%


Meðfylgjandi fréttinni er samningurinn og yfirlýsing frá ráðherrum. Samninginn má einnig finna undir  flipanum kjaramál hér á heimasíðunni.

Áramótapistill 2017/2018

By | Fagmál, Fréttir, Kjaramál | Engar athugasemdir

Okkur þótti rétt að líta aðeins í baksýnisspegilinn og renna lauslega yfir það helsta sem verið hefur á dagskrá hjá okkur á árinu ykkur til upplýsingar. Árið fór rólega af stað með því að við ásamt Félagi geislafræðinga buðum FLOG nemendafélagi í heimsókn til okkar í Borgartúnið. Góður hópur nemenda kíkti við og spurði ýmissa áhugaverðra spurninga. Það er alltaf jafn fróðlegt að spjalla við framtíðarfélagsmenn sér í lagi þegar maður áttar sig á breyttum áherslum sem fylgja nýjum tímum.

Stjórn FL hittist að jafnaði einu sinni í mánuði þar sem tekið er til umfjöllunar það helsta sem er á döfinni. Það geta verið margvísleg mál allt frá því að ræða afstöðu stjórnar til sölu á eignarhlut í sameign BHM til aðildarfélags eða umræða um kjaramál eða framþróun í faginu okkar. Við héldum aðalfund í mars sl. þar sem kosnir voru félagsmenn í stjórnir og nefndir félagsins. Félagið mannar ýmsar nefndir sem sumar hverjar hafa ekki komið saman á árinu. Kannski þurfum við að endurskoða þetta fyrirkomulag og manna nefndir eftir þörfum. Gallinn við það er lengri viðbragðstími og líkur eru á að erfiðara yrði að manna stjórn félagsins ef stuðningsnetið vantar. Ég legg það í ykkar hendur að íhuga það fram að næsta aðalfundi sem ákveðinn hefur verið þann 26. apríl næstkomandi.

Kjaramálin hafa verið áberandi á árinu þó lítill virðist ávinningurinn. Gengið var frá stofnanasamningum á tveimur stofnunum á árinu, en nú eru fimm stofnanir sem enn hafa ekki innleitt ákvæði gerðardóms í sína stofnanasamninga. Formaður hefur reynt að hafa samband við þessar stofnanir en ekki fengið fundi til að ræða stofnanasamninga. Ég legg til að þeir lífeindafræðingar sem starfa á stofnunum sem hafa mjög gamla samninga leggi okkur lið og fari fram á endurskoðun samninga næst þegar þau rekast á yfirmanninn í matsalnum. Að auki höfum við sótt námskeið og fundi í tengslum við stofnanasamningakerfið í heild sinni, rýnifund á vegum BHM um verkfallsaðgerðirnar 2015 og ýmsa samráðsfundi innan Bandalags háskólamanna, bæði formlega og óformlega.

Samninganefnd félagsins hefur fundað mikið á árinu enda rann gerðardómur sitt skeið og kjarasamningar félagsmanna hafa verið lausir frá september 2017. Samninganefndin hefur verið dugleg að rýna gögn í undirbúningsvinnunni, bæði sem við höfum unnið sjálf og einnig gögn sem BHM hefur unnið fyrir okkur. Ég held að það sé óhætt að segja að samninganefnd FL hafi aldrei farið jafn vel nestuð upplýsingum á fund SNR, hvort það skilar miklum ávinningi er hins vegar annað mál. Fundir við viðsemjendur hafa verið fimm á liðnu ári og næsti fundur hefur ekki verið boðaður. Fyrir liggur tilboð frá ríkinu um kjarabætur sem er óásættanlegt eins og staðan er í dag, í það minnsta ef ætlunin er að gera stofnanir ríkisins samkeppnishæfar við almenna markaðinn. Kannski ættum við að hætta þessum tilraunum til forsjárhyggju gagnvart þessum stóra vinnuveitanda og styðja betur við starfandi lífeindafræðinga á almennum markaði, og leyfa ríkinu að tækla sín framtíðarvandamál í friði án okkar afskipta? Ábyrgðin á lágum launum og slæmu starfsumhverfi er alltaf vinnuveitandans en ekki stéttarfélags. Ég held að það sé vandfundið það stéttarfélag sem stendur í vegi fyrir bættum kjörum og starfsumhverfi félagsmanna sinna.

Ekki tókst okkur að gefa út tímarit á þessu ári en það þýðir ekki að við höfum ekki fylgst með nýungum í faginu. Formaður sótti í haust, ásamt fulltrúa stjórnar, aðalfundi allra helstu erlendu samstarfsaðila okkar, norðurlandasamtökunum NML, evrópusamtökum lífeindafræðinga EPBS og alþjóðasamtökum lífeindafræðinga IFBLS. Ekki er búið að lesa yfir fundargerðir þessara funda en þær verða fljótlega settar inn á innri vef félagsmanna þar sem hægt verður að nálgast þær. Á þessum fundum var margt rætt og ljóst er að vandamálin sem steðja að lífeindafræðingum eru ekki þau sömu alls staðar. Þó virðast flestir í þeim sporum að hafa áhyggjur af nýliðun sem virðist hafa verið mjög lítil á lækningarannsóknarstofum undanfarinn áratug eða svo. Sums staðar vantar nær heila kynslóð á vinnustaðina sem skapar ákveðin vandamál þá einkanlega tengd samskiptum og vinnumenningu. Lífeindafræðingar í Evrópu eru einna helst að hugsa um hvernig hægt sé að ná eyrum Evrópubandalagsins til að fá þá til að setja saman reglugerð sem kveður á um lágmarksmenntun lífeindafræðinga, og eins kröfur um hæfni, þekkingu og færni sem tengjast þá umræðunni um heiminn sem einn vinnumarkað og viðmiðum sem sett eru í starfaflokkunarkerfi hvort heldur sem er innlend, evrópsk eða alþjóðleg. Lífeindafræðingum er mikið í mun að aðrir sem ekki hafa þekkingu á störfum okkar setji ekki niður slíkar skilgreiningar heldur sé það gert í samvinnu við lífeindafræðinga. Allir eru spenntir fyrir næsta alþjóðaþingi sem verður næsta haust í Flórenz og lítur út fyrir áhugaverða dagskrá svo það borgar sig að fylgjast vel með. Næsta norðurlandaráðstefna verður svo með öðru sniði en verið hefur undanfarin ár en í stað hefðbundinnar ráðstefnu munu Svíar halda menntaráðstefnu vorið 2019 sem verður sérstaklega miðuð að kennurum í lífeindafræði en Danir munu svo slá saman alþjóðaráðstefnu og norðurlandaráðstefnu og halda veglega ráðstefnu að hausti árið 2020 í Kaupmannahöfn.

Auk þess sem hér er talið upp hefur formaður fundað með samstarfsfélögum okkar í SIGL og gengur samstarfið ljómandi vel. Það er mikil stoð að deila skrifstofu með fleirum, ef málum væri ekki háttað á þann veg þá held ég að Félag lífeindafræðinga kæmist ekki af með formann í 50% starfi og 25% starf skrifstofustjóra. Formaður hefur einnig aðstoðað félagsmenn vegna ýmissa einstaklingsmála, þau eru jafn misjöfn og þau eru mörg. Sum þessara mála stafa af misskilningi og leysast venjulega farsællega á stuttum tíma. Önnur eru flóknari og erfiðari viðureignar og stundum verðum við jafn vel að játa okkur sigruð í glímunni um réttindi félagsmanna á vinnumarkaði eða í starfstengdum málum en það gerum við þó ekki nema okkur finnist allar leiðir fullreyndar.

Í þessari stuttu upptalningu má heldur ekki gleyma þeirri nýbreytni sem félagið reyndi á haustfundi, í tilefni 50 ára afmælis, en þá fórum við úr húsi á viðburð í stað hefðbundinna veitinga eftir fund. Stjórn ákvað einnig að bjóða félagsmönnum í gönguferð í Þórsmörk síðastliðið haust í tengslum við 50 ára afmælið en það vildi ekki betur til en svo að haustlægðirnar dundu yfir okkur einmitt á sama tíma svo ferðinni var frestað um óákveðinn tíma en verður farin næsta vor í staðinn og munum við auglýsa hana með góðum fyrirvara. En að lokum viljum við hjá Félagi lífeindafræðinga nota tækifærið og óska félagsmönnum öllum gæfuríks komandi árs .

Kveðjur, Gyða og Margrét.

Ný merki FL komin!

By | Aðalfundir, Fréttir, Kjaramál | Engar athugasemdir

Kæru félagsmenn.

Nú líður að jólum og við vonumst til að þau verði félagsmönnum friðsæl og ánægjuleg. Eitt og annað hefur drifið á daga okkar hjá FL á árinu og ég mun rifja upp það helsta í pistli sem ég set hér inn um áramót. Einmitt í dag er þó ljóst að hvorki gengur né rekur samningaviðræðum FL og SNR auk þess sem nokkrar stofnanir hafa ekki gengið frá úthlutun 1,65% menntunarákvæði gerðardóms. Ef þú félagsmaður góður starfar á stofnun sem ekki hefur endurnýjað stofnanasamning frá úrskurði gerðardóms hvetjum við þig til að krefja forstöðumenn svara um hverju sætir. Af hverju er ekki gengið frá þessum málum?

Vinstra megin er gamla merkið og hægra megin það nýja.

Nýja merkið hægra megin við hlið þess gamla.

En að ánægjulegra málefni. Félagið hefur nú fengið í hendurnar ný barmmerki félagsins. Þessi nýju merki eru alveg eins og

gömlu merkin utan það að vera aðeins minni og án númers. Nýju merkin eru líka á prjóni en ekki nælu. Stjórn FL hefur ákveðið að ekki verður krafist endurgjalds fyrir merkin og geta félagsmenn því sótt sér merki hingað á skrifstofu félagsins, eða nálgast þau á félagsfundum. Einnig hefur stjórn sett niður dagsetningar bæði fyrir aðalfund félagsins, sem verður haldinn þann 26.apíl næstkomandi, og dagsferð sem féll niður vegna veðurs í haust, en hún verður farin 5.maí. Dagsferðin verður auglýst betur þegar nær dregur en við hvetjum lífeindafræðinga til að merkja strax við þessa daga í dagatalinu fyrir árið 2018.

Að lokum fylgir hér með jólakveðja okkar hjá félaginu til félagsmanna, gleðileg jól.

Ályktun frá stjórnarfundi Félags lífeindafræðinga þann 21.nóvember 2017

By | Kjaramál | Engar athugasemdir

Eftirfarandi ályktun kom fram á stjórnarfundi félagsins í tengslum við yfirsandandi kjaraviðræður ríkisins og FL.

Reykjavík, 21.nóvember 2017

Stjórn Félags lífeindafræðinga telur mjög mikilvægt að ríkið taki ábyrgð sína sem vinnuveitandi alvarlega. Gera þarf miðlægan kjarasamning við Félag lífeindafræðinga sem tryggir launaþróun félagsmanna en auk þess þarf ríkið sem vinnuveitandi að gera stofnunum þeim sem lífeindafræðingar starfa á kleift að ráða til sín nýtt starfsfólk í stað þess stóra hóps sem er að fara á eftirlaun. Til þess þarf að bæta bæði laun og starfsaðstæður. Launasetning á stofnunum er allt of lág, nýútskrifaðir lífeindafræðingar fá umtalsvert betur borgað annars staðar. Starfsumhverfi er oft mjög ábótavant, húsnæði lélegt, jafnvel myglað, álag of mikið og þreyta setur mark sitt á vinnumenninguna. Það er ekki að undra að ungir lífeindafræðingar leiti á almenna markaðinn í stað þess að ráða sig hjá stofnunum ríkisins. Í þessu þarf átak, bæði miðlægt og á stofnunum, ef ríkið hefur áhuga á að starfrækja áfram lækningarannsóknastofur sem mannaðar eru fagmenntuðu starfsfólki. Lífeindafræðingar eru takmörkuð auðlind.

Stjórn FL. 

Nánari upplýsingar um lífeindafræðinga í starfi hjá ríki:

Meðfylgjandi mynd sýnir aldursdreifingu starfandi lífeindafræðinga hjá ríkinu. Mjög margir lífeindafræðingar sem eru 60 ára og eldri eru aðilar að B-sjóði LSR, eða sambærlilegum sjóði sveitarfélaga, og geta því farið á eftirlaun þegar svokallaðri 95 ára reglu hefur verið náð eða þegar samanlagður starfs- og lífaldur hefur náð 95 árum, þó ekki fyrr en í fyrsta lagi við 60 ára aldur. Nú er ljóst af súluritinu, jafnvel þó það taki ekki tillit til starfshlutfalls, að mjög stór hluti starfandi lífeindafræðinga hefur nú þegar náð almennum eftirlaunaaldri, og enn fleiri sé B-sjóðs hópurinn talinn með. Sem betur fer hefur þessi hópur ekki hætt störfum enn og vonandi gerist það ekki í bráð. Það er þó aukin hætta á að þessi mikilvægi hópur lífeindafræðinga, sem  þegar hefur öðlast rétt til eftirlauna, yfirgefi vinnustaðina. Undanfarin ár hefur álag stöðugt aukist, undirmönnun  er viðvarandi og svigrúm til að sinna öðrum nauðsynlegum verkum sem ekki snúa að kjarnastarfssemi minnkar sífellt.  Sameiginlegt átak þarf til að forða stórslysi í þessari mikilvægu grunnþjónustu heilbrigðiskerfisins, hlúa þarf að þeim sem nú þegar eru í starfi svo þeir gefist ekki upp á meðan leitað er að leiðum til að laða unga nýútskrfaða lífeindafræðinga til starfa hjá ríkinu.

Nýr samningur milli BHM og SA

By | Fréttir, Kjaramál | Engar athugasemdir

Nýr ótímabundinn kjarasamningur milli  14 aðildarfélaga Bandalags háskólamanna annars vegar og Samtaka atvinnulífsins hins vegar hefur verið undirritaður. Samningurinn byggir á fyrri kjarasamningi aðila frá árinu 2011. Nyja samninginn má nálgast hér.

Kjarasamningur aðildarfélaga BHM og SA er ólíkur ýmsum öðrum kjarasamningum að því leyti að hann er réttindasamningur en í honum er ekki samið um laun fyrir einstök störf eða starfsmenn. Launakjör eru hins vegar ákvörðuð í ráðningarsamningi milli vinnuveitanda og viðkomandi háskólamanns, og getur starfsmaður óskað árlega eftir viðtali við sinn yfirmann um breytingar á starfskjörum. Sérstakur skýringarrammi var settur í samninginn um þessi árlegu launaviðtöl.

Í samningnum er staðfest áður gert samkomulag aðila um aukið framlag vinnuveitanda í lífeyrissjóði, en framlagið hækkaði í 10% 1. júlí síðast liðinn og hækkar í 11,5% frá 1. júlí 2018. Þá er vinnuveitanda skylt að greiða framlag í Starfsmenntunarsjóð BHM, en það var áður valkvætt. Ný heimildarákvæði voru sett í samninginn, er kveða á um að að valkvætt sé að greiða í Vísindasjóð viðkomandi stéttarfélags og í Starfsþróunarsetur háskólamanna. Nýtt ákvæði var tekið inn um staðgengla, og breytt eða aukin margvísleg ákvæði í ýmsum köflum samningsins, svo sem um uppsagnarfrest á reynslutíma, breytingar á vaktavinnukafla, veikindakafla, fræðslumálum og fleiru. Þá var lögð áhersla á mikilvægi þess að vinnuveitandi og starfsmaður geri með sér skriflegan ráðningarsamning í upphafi ráðningar.

 

Frá haustfundi FL

By | Kjaramál, Starfsumhverfi | Engar athugasemdir

Haustfundur Félags lífeindafræðinga var haldinn fimmtudaginn 21.september 2017 kl. 16:15 að Borgartúni 6, Reykjavík. Fundarsköp voru með hefðbundnum hætti, eftir setningu fundar og kosningu fundarstjóra kynnti Gyða Hrönn Einarsdóttir formaður félagsins stöðuna í yfirstandandi samningaviðræðum félagsins við samninganefnd ríkisins. Fundarmönnum voru kynnt þau gögn sem félagið hefur lagt fyrir samninganefnd ríkisins. Að þessu sinni fór samningaefnd okkar félags ekki fram með hefðbundna kröfugerð heldur var ákveðið að nálgast stöðuna út frá samkeppnishæfni ríkisstofnanna og getu þeirra til að ráða til sín lífeindafræðinga á lækningarannsóknarstofur sínar. Í dag eru lífeindafræðingar takmörkuð auðlind og eftirsóttur starfskraftur á ýmsum sviðum, mikil samkeppni er því um nýútskrifaða lífeindafræðinga og hafa ýmsar stofnanir ríkisins orðið áþreifanlega varar við það.

Að venju fór fram kjör samningaefndar, formaður félagsins á fast sæti í samninganefnd félagsins, önnur sæti er kostið um á haustfundi. Eftirfarandi lífeindafræðingar gáfu kost á sér til að starfa fyrir félagið í samninganefndinni og þökkum við þeim kærlega fyrir.

Aðalmenn:

Fjóla Margrét Óskarsdóttir, Rannsóknarkjarni LSH

Inga Stella Pétursdóttir, FSA

Karen Herjólfsdóttir, Rannsóknarkjarni LSH

Kristín Einarsdóttir, Blóðbankinn

Til vara:

Arna Auður Antonsdóttir, hjartarannsókn LSH

Jóhanna Elísa Engelhartsdóttir Svendsen, Rannsóknarkjrani LSH

Undir liðnum önnur mál urðu líflegar umræður um stöðuna í dag, nýliðunarvandann og vangaveltur um hvað hægt sé að gera til að draga úr nýliðunarvandanum. Stórir árgangar lífeindafræðinga fara að hætta störfum og ungir lífeindafræðingar leita í miklu mæli atvinnu á almenna markaðnum þar sem starfsumhverfið er fjölskylduvænna og grunnlaun eru hærri. Gögn félagsins sýna fram á að hjá opinberum stofnunum starfa 85 lífeindafræðingar sem eru 6o ára eða eldri, eða 39,5% allra starfandi lífeindafræðinga hjá ríkinu. Þessir hópur lífeindafræðinga hefur nær allur öðlast rétt til eftirlauna og sumir hafa nú þegar minnkað við sig starfshlutfall og hafið töku eftirlauna. Líklega tekur það Háskóla Íslands um áratug að útskrifa nægilega marga lífeindafræðinga til að fylla þetta skarð, og enn lengri tíma ef ekki er gætt að því að stofnanir ríkissins verði samkeppnishæfar um launakjör og starfsaðstæður.

Haustfund sóttu á fjórða tug félagsmanna og flestir komu svo með okkur á bjór-pubquiz í Ægisgarði, en ákveðið var að bjóða upp á annars konar skemmtun að loknum fundi en hefðbundið er. Tilefnið er að sjálfsögðu 50 ára afmælisár félagsins. Að sama skapi var áætlað að bjóða félagsmönnum upp á ferð í Þórsmörk, laugardaginn 23. september en þeirri ferð var frestað vegna slæmrar verðurspár en verður sett á dagskrá síðar.

Ályktun frá stjórnarfundi FL um skipuritsbreytingar á Landspítala

By | Fagmál, Starfsumhverfi | Engar athugasemdir

Af ályktun sl. aðalfundar Læknafélags Reykjavíkur um trúnaðarbrest sem birtist m.a. á heimasíðu þeirra á http://www.lis.is/lis/Frettir/nanar/8418/frettir-fra-adalfundi-lr og skrifað var um á Vísi.is hér: http://www.visir.is/g/2017170539911 má draga þá ályktun að yfirlæknar og sérfræðilæknar rannsóknarstofa Landspítala telji öryggi sjúklinga ógnað af nýlegum skipuritsbreytingum á sviðinu þar sem deildarstjóri, lífeindafræðingur, er færður að hlið yfirlæknis í skipuriti. Nú sýnir skipuritið álíka teymisstjórnun deildanna eins og tíðkast á flestum öðrum deildum Landspítala.

Stjórn Félags lífeindafræðinga lýsir furðu sinni á þessari afstöðu fundarins og við teljum að hann endurspegli mikla vanþekkingu á menntun lífeindafræðinga, hæfni og þekkingu. Sífellt stærri hópur lífeindafræðinga lýkur nú námi á M.S stigi og fleiri og fleiri bæta einnig við sig sérhæfðara námi sem tengist stjórnun og mannauðsmálum.

Að auki telur stjórn FL skipuritsbreytingarnar sem ályktað er um ekki vera breytingu á starfssviði, hvorki deildarstjóra eða yfirlækna. Hér verið að uppfæra skipurit til að endurspegla þá stjórnun sem viðhöfð hefur verið um langa hríð á rannsóknarstofunum. Yfirlífeindafræðingar/deildarstjórar hafa um árabil séð um að stýra daglegum störfum lífeindafræðinga, ritara og margra annarra sérhæfðra starfsmanna; séð um innkaup á daglegum rekstrarvörum og haft umsjón með daglegum rekstri deildanna. Hér er að okkar mati ekki verið að taka af yfirlæknum faglegt forræði yfir rannsóknarstofum, þeir munu áfram bera ábyrgð á því hvaða rannsóknir eru gerðar og með hvaða aðferðum þær eru framkvæmdar, líkt og þeir gerðu fyrir breytingar. Lífeindafræðingarnir munu sem fyrr stýra daglegri framkvæmd.

Ef við horfum til næstu nágranna okkar, norðurlanda, þá eru áratugir síðan slíkar skipuritsbreytingar voru gerðar þar, bæði í Noregi, Danmörku og í Svíþjóð. Raunin er reyndar sú að þar er tilhneyging til að hverfa frá slíku teymis-skipulagi og aftur yfir í einn stjórnanda á rannsóknarstofum, og er það þá algengara en ekki að sá stjórnandi sé lífeindafræðingur. Nú eru þar fjölmargar rannsóknarstofur sem ýmist eru vottaðar eða faggildar skv. ISO 15189 sem reknar eru af lífeindafræðingum. Engu að síður starfa þar sérfræðilæknar sem bera ábyrgð ákveðnum verkþáttum eins og staðallinn kveður á um. Stjórn FL veltir því fyrir sér hvort við á Íslandi eigum ekki að stefna þangað líka? Að lífeindafræðingar stýri og beri fulla ábyrgð á rekstri rannsóknarstofa Landspítala? Sannarlega má finna lífeindafræðinga sem hafa til þess bæði menntun og hæfni. Við leggjum það allavega til ef ekki fást til starfa á rannsóknarstofurnar fagmenn sem hafa tileinkað sér teymisvinnubrögð.

Stjórn FL harmar þann óróa sem verið hefur á rannsóknarstofunum vegna þessara breytinga. Þetta hefur haft slæm áhrif á starfsemina, á alla starfsmenn, og var varla á það bætandi þar sem mikill vöntun hefur verið á lífeindafræðingum til starfa og álag mikið vegna skorts á nýliðun en stór hópur hefur verið að fara á eftirlaun. Nýir lífeindafræðingar staldra stutt við vegna viðvarandi láglaunastefnu, mikils álags, samsetningar starfsmannahópsins og skorts á sérfræðistöðum. Stjórn FL hvetur lækna og lífeindafræðinga að taka höndum saman og takast á við það verkefni að byggja upp rannsóknarstofur LSH svo um verði að ræða framsækinn þekkingarvinnustað þar sem fagmennska er í fyrirrúmi, samskipti einkennast af vinsemd og virðingu, stað þar sem ungir og upprennandi visindamenn og aðrir fagmenn hafa áhuga á að starfa á.

Úthlutun hvatningarsjóðs 2017

By | Fagmál, Nemar | Engar athugasemdir

Í gær, þann 8. júní fór fram úthlutun úr hvatningarsjóði félagsins en tilgangur hans er að veita þeim lífeindafræðingum viðurkenningu og hvatningu sem skarað hafa fram úr á einhvern máta í námi í lífeindafræði og þannig styrkja tengsl Félags lífeindafræðinga við Geisla- og lífeindafræðiskor í Háskóla Íslands. Hófið var vel sótt af nemum, kennurum og auk þess var að þessu sinni nokkur fjöldi fjölskyldumeðlima verðlaunahafanna sem sótti hófið og var það mjög ánægjulegt.

Að þessu sinni voru það þær Eva Hauksdóttir sem fékk fyrstu verðlaun, 300.000 kr, en hún var með hæstu einkunn á B.Sc prófi að þessu sinni. Guðbjörg Júlía Magnúsdóttir og Harpa Sif Halldórsdóttir voru svo hnífjafnar með næsthæstu einkunn á B.Sc prófi og fengu báðar önnur verðlaun að upphæð 100.000 kr.

Hér má sjá verðlaunahafa hvatningarsjóðs að þessu sinni og óskum við þeim, sem og öðrum lífeindafræðinemum sem eru að ljúka B.Sc, Diplóma eða M.S prófi um þessar mundir hjartanlega til hamingju með árangurinn, og óskum þeim velfarnaðar í framtíðinni.

Framlengdur umsóknarfrestur nemastyrks fræðslusjóðs.

By | Erlent, Nemar | Engar athugasemdir

Þar sem frestur til að skila ágripum á norðurlandaráðstefnu lífeindafræðinga í Finnlandi í haust hefur verið framlengdur til 16. júlí 2017 hefur verið ákveðið að framlengja einnig umsóknarfrest um nemastyrk fræðslusjóðs, en um tilraunaverkefni er að ræða og yrði þetta í fyrsta sinn sem félagið styrkir nema til að taka þátt í nemahluta ráðstefnu. Umsóknarfresturinn verður til og með 31.ágúst 2017. Hér neðar er að finna upprunalegu auglýsingu Vísinda- og fræðslusjóðs um styrkinn, með breyttum umsóknarfresti:

 

Stjórn Vísinda- og fræðslusjóðs FL hefur ákveðið að bjóða tveimur nemendum í lífeindafræði eða nýútskrifuðum lífeindafræðingum styrk til að sækja stúdentahluta norðurlandaráðstefnu NML í Helsinki dagana 5-7 október 2017.

Heildarupphæð styrkveitingar verður: 140.000 ISK hvor styrkur.

 

Sjóðsstjórn setur ákveðin skilyrði fyrir styrkveitingunni, þau eru eftirfarandi:

  1. Styrkþegi þarf að hafa nemaaðild að Félagi lífeindafræðinga
  2. Styrkþegi þarf að hafa samþykkt ágrip á ráðstefnuna
  3. Ef umsækjendur verða fleiri en tveir mun úthlutun stykja ráðast af eftirfarandi:
  • Samþykkt ágrip sem verður einnig flutt sem munnlegt erindi raðast ofar en ágrip sem eingöngu er birt sem veggspjald
  • Nemandi sem er lengra komin í námi gengur fyrir nema sem er styttra komin í námi.

 

Sjá nánari upplýsingar um Student Forum: http://www.nml2017.fi/studentforum.html

 

Umsóknir um styrkinn skulu sendar á umsóknareyðublaði Fræðslusjóðs FL sem finna má á heimasíðu félagsins til  fl@bhm.is fyrir 31.ágúst 2017.  Í viðbótarupplýsingum þarf að koma fram hversu langt nemandi er kominn í námi sínu, heiti ágrips, rökstuðningur fyrir því af hverju viðkmandi nemi ætti að hljóta styrkinn og hvernig hann mum eftir þingið nýta sér það sem hann hefur lært á þinginu.

Hugleiðingar frá félagsmanni

By | Óflokkað | Engar athugasemdir

Eftirfarandi bréf fengum við frá félagsmanni og þótti ástæða til að birta það hér, kærar þakkir fyrir þörf orð og góða hugleiðingu Martha.

Hugleiðingar um deildarstjóra og lífeindafræði
 
Mig langar til að deila með ykkur hugsunum sem hafa komið upp í hugann eftir að stjórnunarábyrgð sem yfirlífeindafræðingar báru svo sannarlega í verki hefur nú verið viðurkennd í raun. Eftir áratuga baráttu eru lífeindafræðingar nú deildarstjórar á stærstu rannsóknastofunum og starfa þar við hlið yfirlækna. Hvor þessara stjórnenda um sig ber sinn hluta af ábyrgðinni á stafsemi rannsóknadeildanna og framkvæmdastjóri rannsóknasviðs er þeirra næsti yfirmaður.
 
Vitað var að lífeindafræðingar myndu mæta andstöðu vegna þessa, en kannski ekki hve langt yrði gengið. Þannig að meira hefur mætt á þessum fyrstu deildarstjórum en búist var við. Ég er einlæglega þakklát  þeim fyrir að hafa ekki gefið árar í bát heldur haldið áfram og tekist á við ýmiskonar andstreymi ásamt því að reka þessar mikilvægu deildir og móta stefnuna í ljósi þess að nú er fyrir hendi umboð til að gera breytingar.
 
Mig grunar að marga daga hafa deildarstjórarnir okkar farið heim með hnút í maganum yfir hlutum sem ekki voru taldir upp í starfslýsingunni og voru þeim erfiðari úrlausnar en fagleg viðfangsefni sem þar er lýst. Þess vegna er það mjög mikilvægt að við lífeindafræðingar gerum allt sem við getum til að standa fast við bakið á þeim, styðjum þá með ráðum og dáð og viðukennum sjálf ábyrgð þeirra. Deildarstjórarnir eru að setja störf lífeindafræðinga í farveg sem mótast af sýn lífeindafræðinga á starf sitt og ábyrgð. Hvernig til tekst skiptir mjög miklu máli fyrir þróun fagsins/stéttarinnar.
 
Lífeindafræðingar bera faglega og stjórnunarlega ábyrgð á störfum sínum þar sem aðferðafræði rannsókna, sjúkdómafræði, gæðastjórnun og öryggisvarsla tvinnast saman. Það er þetta sem nú hefur endanlega verið viðurkennt og við þetta miðast menntun í lífeindafræði. Góð þekking og leikni í þessum þáttum er það sem einkennir góðan lífeindafræðing – sem síðan tilheyrir hópi fagstétta í heilbrigðisvísindum sem vinna saman fyrir sjúklinginn.
 
Með félagskveðju
Martha Á. Hjálmarsdóttir