Category

Fagmál

Áramótapistill 2017/2018

By | Fagmál, Fréttir, Kjaramál | Engar athugasemdir

Okkur þótti rétt að líta aðeins í baksýnisspegilinn og renna lauslega yfir það helsta sem verið hefur á dagskrá hjá okkur á árinu ykkur til upplýsingar. Árið fór rólega af stað með því að við ásamt Félagi geislafræðinga buðum FLOG nemendafélagi í heimsókn til okkar í Borgartúnið. Góður hópur nemenda kíkti við og spurði ýmissa áhugaverðra spurninga. Það er alltaf jafn fróðlegt að spjalla við framtíðarfélagsmenn sér í lagi þegar maður áttar sig á breyttum áherslum sem fylgja nýjum tímum.

Stjórn FL hittist að jafnaði einu sinni í mánuði þar sem tekið er til umfjöllunar það helsta sem er á döfinni. Það geta verið margvísleg mál allt frá því að ræða afstöðu stjórnar til sölu á eignarhlut í sameign BHM til aðildarfélags eða umræða um kjaramál eða framþróun í faginu okkar. Við héldum aðalfund í mars sl. þar sem kosnir voru félagsmenn í stjórnir og nefndir félagsins. Félagið mannar ýmsar nefndir sem sumar hverjar hafa ekki komið saman á árinu. Kannski þurfum við að endurskoða þetta fyrirkomulag og manna nefndir eftir þörfum. Gallinn við það er lengri viðbragðstími og líkur eru á að erfiðara yrði að manna stjórn félagsins ef stuðningsnetið vantar. Ég legg það í ykkar hendur að íhuga það fram að næsta aðalfundi sem ákveðinn hefur verið þann 26. apríl næstkomandi.

Kjaramálin hafa verið áberandi á árinu þó lítill virðist ávinningurinn. Gengið var frá stofnanasamningum á tveimur stofnunum á árinu, en nú eru fimm stofnanir sem enn hafa ekki innleitt ákvæði gerðardóms í sína stofnanasamninga. Formaður hefur reynt að hafa samband við þessar stofnanir en ekki fengið fundi til að ræða stofnanasamninga. Ég legg til að þeir lífeindafræðingar sem starfa á stofnunum sem hafa mjög gamla samninga leggi okkur lið og fari fram á endurskoðun samninga næst þegar þau rekast á yfirmanninn í matsalnum. Að auki höfum við sótt námskeið og fundi í tengslum við stofnanasamningakerfið í heild sinni, rýnifund á vegum BHM um verkfallsaðgerðirnar 2015 og ýmsa samráðsfundi innan Bandalags háskólamanna, bæði formlega og óformlega.

Samninganefnd félagsins hefur fundað mikið á árinu enda rann gerðardómur sitt skeið og kjarasamningar félagsmanna hafa verið lausir frá september 2017. Samninganefndin hefur verið dugleg að rýna gögn í undirbúningsvinnunni, bæði sem við höfum unnið sjálf og einnig gögn sem BHM hefur unnið fyrir okkur. Ég held að það sé óhætt að segja að samninganefnd FL hafi aldrei farið jafn vel nestuð upplýsingum á fund SNR, hvort það skilar miklum ávinningi er hins vegar annað mál. Fundir við viðsemjendur hafa verið fimm á liðnu ári og næsti fundur hefur ekki verið boðaður. Fyrir liggur tilboð frá ríkinu um kjarabætur sem er óásættanlegt eins og staðan er í dag, í það minnsta ef ætlunin er að gera stofnanir ríkisins samkeppnishæfar við almenna markaðinn. Kannski ættum við að hætta þessum tilraunum til forsjárhyggju gagnvart þessum stóra vinnuveitanda og styðja betur við starfandi lífeindafræðinga á almennum markaði, og leyfa ríkinu að tækla sín framtíðarvandamál í friði án okkar afskipta? Ábyrgðin á lágum launum og slæmu starfsumhverfi er alltaf vinnuveitandans en ekki stéttarfélags. Ég held að það sé vandfundið það stéttarfélag sem stendur í vegi fyrir bættum kjörum og starfsumhverfi félagsmanna sinna.

Ekki tókst okkur að gefa út tímarit á þessu ári en það þýðir ekki að við höfum ekki fylgst með nýungum í faginu. Formaður sótti í haust, ásamt fulltrúa stjórnar, aðalfundi allra helstu erlendu samstarfsaðila okkar, norðurlandasamtökunum NML, evrópusamtökum lífeindafræðinga EPBS og alþjóðasamtökum lífeindafræðinga IFBLS. Ekki er búið að lesa yfir fundargerðir þessara funda en þær verða fljótlega settar inn á innri vef félagsmanna þar sem hægt verður að nálgast þær. Á þessum fundum var margt rætt og ljóst er að vandamálin sem steðja að lífeindafræðingum eru ekki þau sömu alls staðar. Þó virðast flestir í þeim sporum að hafa áhyggjur af nýliðun sem virðist hafa verið mjög lítil á lækningarannsóknarstofum undanfarinn áratug eða svo. Sums staðar vantar nær heila kynslóð á vinnustaðina sem skapar ákveðin vandamál þá einkanlega tengd samskiptum og vinnumenningu. Lífeindafræðingar í Evrópu eru einna helst að hugsa um hvernig hægt sé að ná eyrum Evrópubandalagsins til að fá þá til að setja saman reglugerð sem kveður á um lágmarksmenntun lífeindafræðinga, og eins kröfur um hæfni, þekkingu og færni sem tengjast þá umræðunni um heiminn sem einn vinnumarkað og viðmiðum sem sett eru í starfaflokkunarkerfi hvort heldur sem er innlend, evrópsk eða alþjóðleg. Lífeindafræðingum er mikið í mun að aðrir sem ekki hafa þekkingu á störfum okkar setji ekki niður slíkar skilgreiningar heldur sé það gert í samvinnu við lífeindafræðinga. Allir eru spenntir fyrir næsta alþjóðaþingi sem verður næsta haust í Flórenz og lítur út fyrir áhugaverða dagskrá svo það borgar sig að fylgjast vel með. Næsta norðurlandaráðstefna verður svo með öðru sniði en verið hefur undanfarin ár en í stað hefðbundinnar ráðstefnu munu Svíar halda menntaráðstefnu vorið 2019 sem verður sérstaklega miðuð að kennurum í lífeindafræði en Danir munu svo slá saman alþjóðaráðstefnu og norðurlandaráðstefnu og halda veglega ráðstefnu að hausti árið 2020 í Kaupmannahöfn.

Auk þess sem hér er talið upp hefur formaður fundað með samstarfsfélögum okkar í SIGL og gengur samstarfið ljómandi vel. Það er mikil stoð að deila skrifstofu með fleirum, ef málum væri ekki háttað á þann veg þá held ég að Félag lífeindafræðinga kæmist ekki af með formann í 50% starfi og 25% starf skrifstofustjóra. Formaður hefur einnig aðstoðað félagsmenn vegna ýmissa einstaklingsmála, þau eru jafn misjöfn og þau eru mörg. Sum þessara mála stafa af misskilningi og leysast venjulega farsællega á stuttum tíma. Önnur eru flóknari og erfiðari viðureignar og stundum verðum við jafn vel að játa okkur sigruð í glímunni um réttindi félagsmanna á vinnumarkaði eða í starfstengdum málum en það gerum við þó ekki nema okkur finnist allar leiðir fullreyndar.

Í þessari stuttu upptalningu má heldur ekki gleyma þeirri nýbreytni sem félagið reyndi á haustfundi, í tilefni 50 ára afmælis, en þá fórum við úr húsi á viðburð í stað hefðbundinna veitinga eftir fund. Stjórn ákvað einnig að bjóða félagsmönnum í gönguferð í Þórsmörk síðastliðið haust í tengslum við 50 ára afmælið en það vildi ekki betur til en svo að haustlægðirnar dundu yfir okkur einmitt á sama tíma svo ferðinni var frestað um óákveðinn tíma en verður farin næsta vor í staðinn og munum við auglýsa hana með góðum fyrirvara. En að lokum viljum við hjá Félagi lífeindafræðinga nota tækifærið og óska félagsmönnum öllum gæfuríks komandi árs .

Kveðjur, Gyða og Margrét.

Ályktun frá stjórnarfundi FL um skipuritsbreytingar á Landspítala

By | Fagmál, Starfsumhverfi | Engar athugasemdir

Af ályktun sl. aðalfundar Læknafélags Reykjavíkur um trúnaðarbrest sem birtist m.a. á heimasíðu þeirra á http://www.lis.is/lis/Frettir/nanar/8418/frettir-fra-adalfundi-lr og skrifað var um á Vísi.is hér: http://www.visir.is/g/2017170539911 má draga þá ályktun að yfirlæknar og sérfræðilæknar rannsóknarstofa Landspítala telji öryggi sjúklinga ógnað af nýlegum skipuritsbreytingum á sviðinu þar sem deildarstjóri, lífeindafræðingur, er færður að hlið yfirlæknis í skipuriti. Nú sýnir skipuritið álíka teymisstjórnun deildanna eins og tíðkast á flestum öðrum deildum Landspítala.

Stjórn Félags lífeindafræðinga lýsir furðu sinni á þessari afstöðu fundarins og við teljum að hann endurspegli mikla vanþekkingu á menntun lífeindafræðinga, hæfni og þekkingu. Sífellt stærri hópur lífeindafræðinga lýkur nú námi á M.S stigi og fleiri og fleiri bæta einnig við sig sérhæfðara námi sem tengist stjórnun og mannauðsmálum.

Að auki telur stjórn FL skipuritsbreytingarnar sem ályktað er um ekki vera breytingu á starfssviði, hvorki deildarstjóra eða yfirlækna. Hér verið að uppfæra skipurit til að endurspegla þá stjórnun sem viðhöfð hefur verið um langa hríð á rannsóknarstofunum. Yfirlífeindafræðingar/deildarstjórar hafa um árabil séð um að stýra daglegum störfum lífeindafræðinga, ritara og margra annarra sérhæfðra starfsmanna; séð um innkaup á daglegum rekstrarvörum og haft umsjón með daglegum rekstri deildanna. Hér er að okkar mati ekki verið að taka af yfirlæknum faglegt forræði yfir rannsóknarstofum, þeir munu áfram bera ábyrgð á því hvaða rannsóknir eru gerðar og með hvaða aðferðum þær eru framkvæmdar, líkt og þeir gerðu fyrir breytingar. Lífeindafræðingarnir munu sem fyrr stýra daglegri framkvæmd.

Ef við horfum til næstu nágranna okkar, norðurlanda, þá eru áratugir síðan slíkar skipuritsbreytingar voru gerðar þar, bæði í Noregi, Danmörku og í Svíþjóð. Raunin er reyndar sú að þar er tilhneyging til að hverfa frá slíku teymis-skipulagi og aftur yfir í einn stjórnanda á rannsóknarstofum, og er það þá algengara en ekki að sá stjórnandi sé lífeindafræðingur. Nú eru þar fjölmargar rannsóknarstofur sem ýmist eru vottaðar eða faggildar skv. ISO 15189 sem reknar eru af lífeindafræðingum. Engu að síður starfa þar sérfræðilæknar sem bera ábyrgð ákveðnum verkþáttum eins og staðallinn kveður á um. Stjórn FL veltir því fyrir sér hvort við á Íslandi eigum ekki að stefna þangað líka? Að lífeindafræðingar stýri og beri fulla ábyrgð á rekstri rannsóknarstofa Landspítala? Sannarlega má finna lífeindafræðinga sem hafa til þess bæði menntun og hæfni. Við leggjum það allavega til ef ekki fást til starfa á rannsóknarstofurnar fagmenn sem hafa tileinkað sér teymisvinnubrögð.

Stjórn FL harmar þann óróa sem verið hefur á rannsóknarstofunum vegna þessara breytinga. Þetta hefur haft slæm áhrif á starfsemina, á alla starfsmenn, og var varla á það bætandi þar sem mikill vöntun hefur verið á lífeindafræðingum til starfa og álag mikið vegna skorts á nýliðun en stór hópur hefur verið að fara á eftirlaun. Nýir lífeindafræðingar staldra stutt við vegna viðvarandi láglaunastefnu, mikils álags, samsetningar starfsmannahópsins og skorts á sérfræðistöðum. Stjórn FL hvetur lækna og lífeindafræðinga að taka höndum saman og takast á við það verkefni að byggja upp rannsóknarstofur LSH svo um verði að ræða framsækinn þekkingarvinnustað þar sem fagmennska er í fyrirrúmi, samskipti einkennast af vinsemd og virðingu, stað þar sem ungir og upprennandi visindamenn og aðrir fagmenn hafa áhuga á að starfa á.

Úthlutun hvatningarsjóðs 2017

By | Fagmál, Nemar | Engar athugasemdir

Í gær, þann 8. júní fór fram úthlutun úr hvatningarsjóði félagsins en tilgangur hans er að veita þeim lífeindafræðingum viðurkenningu og hvatningu sem skarað hafa fram úr á einhvern máta í námi í lífeindafræði og þannig styrkja tengsl Félags lífeindafræðinga við Geisla- og lífeindafræðiskor í Háskóla Íslands. Hófið var vel sótt af nemum, kennurum og auk þess var að þessu sinni nokkur fjöldi fjölskyldumeðlima verðlaunahafanna sem sótti hófið og var það mjög ánægjulegt.

Að þessu sinni voru það þær Eva Hauksdóttir sem fékk fyrstu verðlaun, 300.000 kr, en hún var með hæstu einkunn á B.Sc prófi að þessu sinni. Guðbjörg Júlía Magnúsdóttir og Harpa Sif Halldórsdóttir voru svo hnífjafnar með næsthæstu einkunn á B.Sc prófi og fengu báðar önnur verðlaun að upphæð 100.000 kr.

Hér má sjá verðlaunahafa hvatningarsjóðs að þessu sinni og óskum við þeim, sem og öðrum lífeindafræðinemum sem eru að ljúka B.Sc, Diplóma eða M.S prófi um þessar mundir hjartanlega til hamingju með árangurinn, og óskum þeim velfarnaðar í framtíðinni.

Öryggisbúnaður á nálar 2013

By | Fagmál, Fréttir | Engar athugasemdir

Samkvæmt reglugerð frá Evrópusambandinu þá á að vera búið að innleiða svona öryggisnálar í maí 2013.
Frekari upplýsingar eru i pdf.skjölum hér fyrir neðan.

Ég vil hvetja lífeindafræðinga til að kynna sér þessi mál og taka fullan þátt í því að framfylgja þessari reglugerð.

Fyrirhugað er að setja upp facebókarsíðu fyrir félagið sem hægt væri að nota sem samskipta síðu, m.a. um þessi mál.

nalar 1

report_from_european_bio-safety_summit_2012.pdf

nalar3

fra_noregi_um_nyjan_oryggisbunad_a_nalar.pdf

fra_finlandi_um_nyjan_oryggisbunad_a_nalar.pdf

NML2013

By | Erlent, Fagmál | Engar athugasemdir

Norðurlandaráðstefna lífeindafræðinga NML2013 verður dagana 12.-15. júní n.k. í Þrándheimi í Noregi. Við höfum sett hnapp með tengil á heimasíðu ráðstefnunnar hér á forsíðuna til hægri.

fyrsta auglýsingin frá þeim fylgir hér með í pdf.skjali:

docs-_330758-v1-nml_congress_2013_advertisement_for_iceland.pdf

Látum hér fylgja með þær upplýsingar sem við fengum í tölvupósti:

The NML Congress is an important Nordic arena for professional updating, inspiration and networking for Biomedical Laboratory Scientists.

Scientific programme
The NML congress 2013 offers one plenary session and five parallel sessions each day, as well as several additional special sessions for in-depth learning in selected subjects. There will be lectures in the following subjects: Medical biochemistry, clinical pharmacology, haematology, coagulation, immunology, transfusion medicine, medical microbiology, histology and cytology, point of care testing, Preanalysis, biobanking, flowcytometry, education, management and ethics.

Language
The official congress language is English.

Posters and oral presentations
Abstracts for both oral and poster presentations at the NML Congress will be accepted. Deadline for receipt of abstracts is 1 February 2013. Download application form and more information from the congress website

www.nml2013.no

Travel, accommodation and social events
Trondheim is the historic capital of Norway and the Congress social programme of the congress will give participants the opportunity to explore the city. Trondheim is located in the middle of Norway with easy access by plane from Reykjavik to Trondheim Airport Værnes. Hotels and social events can be booked through the on-line registration.

Website:
More information, scientific programme, poster information, prices and deadlines are to be found at the congress website www.nml2013.no

NITO The Norwegian Institute of Biomedical Science welcomes you all to attend this exciting event in Trondheim June 2013!

Best regards
Marie Nora Roald
Senior Consultant
The Norwegian Institute of Biomedical Science
Phone direct +47 22 05 62 68 I Mobile +47 415 70 968 I Phone +47 22 05 35 00
E-mail marie.nora.roald@nito.no  I Web www.nito.no/bfi